نعم انها تلك اللحظة !
لما تلاقي فجأة الدنيا ماشية ضد كل اللي انت مصدقه !
ماشية ضد كل معتقدات الطفل اللي جواك .. فاضطرته يكبر
يفضل الطفل دة يكبر مع كل مشكلة لحد ما يعجّز .. شعرك يشيب وانت لسة
مكملتش الـ 20 سنة !
لحد ما تموت وانت لسة على الأرض !!
قلبك يقف ، مع انه لسه بيدق ..
____________
ستووووووووب !
اية الكآبة دي !!!!!
ليه عملت في نفسك كدة ؟!!
أيوة انت اللي عملت !
انت اللي شفت كلمتين ع الفيس بوك بيوجعوا شوية ، روحت افتكرت موقف ليه
علاقة بالكلام دة خلّى الطفل اللي جواك حس ان الدنيا أصلا وحشة أوي فـ كبر سنة ..
انت اللي وقعت في مشكلة و قلت مش هتتحل ! أصل أنا عااارف يا جماعة !!
خليت الطفل اللي جواك حس إن الدنيا صعب تتعاش فـ كبر كمان سنة
انت اللي لما اتأذيت من شخص قلت ما هو كل البشر كدة ، وياعيني صدقك !
وكبر كمان سنة ..
انت اللي لما حد قالك ازيك ، عامل اية؟ قعدت تفكر ياااااااه ع الهموم
اللي أنا فيها .. الطفل اللي جواك صدق ان كل حياته هموم و اتعلم اليأس ومن بعدها
.. كبر سنيييين ..
انت السبب في حالته اللي مش عاجباك دلوقتى !
كان لازم تقف جنبه ! كان لازم تقوله متخافش !! كل اللي جاي أحسن
على فكرة كان هيصدقك لأنه كان مستنيها منك .. وعلى فكرة مكنتش هتبقى
بتكذب !
حياتك حلوة فعلا .. بس انت اللي مخدتش بالك !!
احسبها !
فلاش بااااك لو سمحت ..
شفت بوست ع الفيس بوك فكرك بكل اللي حصلك ؟ طيب مفتكرتش ايه كل الحلو
اللي حصلك قصاد الوحش دة ؟ !
وقعت في مشكلة و قلت مش هتتحل ؟! طيب ما كنت تجرب تروح للي خلقك
وتقوله "يــارب" ! أكيد انت عارف انه هيقدر يحلها !!
لما اتسألت "ازيك" عدّى قدام عنيك كل اللي شفته الـ كام يوم
اللي فاتوا وكانوا بجد وحشين أوي ؟! عارف انك لو عديت الحاجات الحلوة اللي حصلت في
يوم واحد بس من الأيام دي هيغلب الوحش ؟ أقلها ربنا هو ربك و لو دعيت في أي وقت
هتلاقيه سامعك ;)
"كل ما حد يقولك ازيك عامل اية؟ قوله الحمدلله مبسوط قوي.. قوليها بسرعة من غير ما تفكر و ابتسم.. لوحدك هتتبسط فعلا.
عمرو سلامة"
قابلت كام واحد في حياتك عملوا فيك اللي متعملش صح ؟!
عندك كام واحد صاحبك بجد .. جدع أوي و أول لما حسوا انك اتأذيت عملولك
أراجوزات عشان تتبسط و تنسى ؟
اللي خلقك أكيد مخلقكش عشان
تعيش مكتئب !
في عز ما تكون متضايق قول "يــارب" .. قولها و انت واثق انه
هيحل كل مشاكلك ، و هيديك الأحسن من اللي كل اللي كان نفسك فيه .. أصلك لو مكنتش
واثق في رحمة "أرحم الراحمين" هتثق فـ مين ؟!
والله والله ربنا كريم أوي :)
في ناس ممكن يشوفوها مجرد تخاريف متقائلة ..
بس هي هتفضل مصدقة انها مش تخاريف ، و هتفضل عايشة متفائلة ;)
